"E si vi vasu sta duci vuccuzza...nun sputu ca nun perdu la ducizza"

Ottave d'amore

Unni camini tu, unni scarpisi
trema la terra unni li pedi posi
nascinu sciuri di milli divisi
sciuri di baccu, garofani e rosi

Bedda ca t'agghiu a vinniri 'mprummisi
e t'imprummisi vintisetti cosi
novi giardina , novi paradisi
novi canti d'aceddi unni riposi

Siti cchiù bedda vui di la ricotta
cchiù bianca di la nivi siti tutta
siti comu 'na fica murgisotta
veni lu ventu e vi scutola tutta
Vidi ch'è mariùsa sta picciotta
jucari nun ci vogghiu e didda ammutta
vaja , bidduzza , parati sta botta
sta canzuna ppi ttia , ppi ttia fu fatta

Curuzzu, lu me cori si sminuzza
ppi vidiri sta vostra biddizza
unni scarpisa la vostra scarpuzza
lassa petri davanti a la munnizza
Quannu vi pittinati sta tistuzza
luci comu lu suli la to' trizza
e si vi vasu sta duci vuccuzza
nun sputu ca nun perdu la ducizza

Nun dormu ca riposu a ttia pinzannu
passu li notti interi senza sonnu
sempri la to' biddizza cuntiplannu
cussì passu lu tempu 'nzinu a gghiornu
Mi votu e mi rivotu suspirannu
mentri li nervi mia suffriri nun ponnu
bedda p'amari a vui, p'amari a vui
bedda p'amari a vui mi sentu l'affannu

Rosa Balistreri & Taberna Mylaensis